Rama dhe Demo takojnë Policinë pas tensioneve; ministri: Te Komisariati nr. 3 u kalua “vija e kuqe”
Kryeministri Edi Rama dhe ministri i Brendshëm Ervin Demo u takuan me drejtues e efektivë të Policisë së Shtetit pas përplasjeve të një dite më parë. Demo tha se sulmi ndaj Komisariatit nr. 3 dhe dëmtimet e shkaktuara e kaluan kufirin e një proteste normale.
Kryeministri Edi Rama dhe ministri i Brendshëm Ervin Demo zhvilluan sot një takim me drejtues dhe efektivë të Policisë së Shtetit, një ditë pas tensioneve që u shënuan në protestat e fundit.
Në fjalën e tij, Demo u ndal te ngjarjet pranë Komisariatit nr. 3, duke deklaruar se situata e krijuar “e ka kaluar vijën e kuqe”. Sipas tij, komisariati “është sulmuar nga protestues” dhe janë dëmtuar godina si edhe punonjësit që po e mbronin atë.
Ministri theksoi se niveli i dhunës i regjistruar nuk përputhet me standardet e një proteste paqësore. Ai shtoi gjithashtu se disa persona të përfshirë në përplasje kishin kërkuar strehim në selinë e një subjekti politik, gjë që, sipas tij, tregon motivimin e tyre.
“Dhuna nuk ka vend në një shoqëri demokratike. Qeveria dhe kryeministri e kanë bërë të qartë se jemi gati për dialog, por dhuna nuk mund të pranohet”, deklaroi Demo gjatë takimit me policinë.
Takimi u fokusua në vlerësimin e situatës dhe në qëndrimin e autoriteteve ndaj ngjarjeve të një dite më parë, ndërsa nuk u dhanë detaje të tjera mbi masat e ardhshme.
