Qendra Europiane për Lirinë e Shtypit alarmohet: 25 sulme ndaj gazetarëve gjatë protestave në Tiranë
ECPMF njofton se në 6 ditë protesta në Tiranë janë shënuar të paktën 25 sulme kundër gazetarëve dhe i bën thirrje policisë të garantojë punën e medias.
Qendra Evropiane për Lirinë e Shtypit dhe Medias (ECPMF) bëri të ditur se gjatë gjashtë ditëve të protestave të dhunshme në Tiranë janë regjistruar të paktën 25 raste sulmesh ndaj gazetarëve. Organizata thotë se është e alarmuar nga situata dhe kërkon masa urgjente për sigurinë e reporterëve në terren.
ECPMF, me seli në Leipzig të Gjermanisë, dënon aktet e dhunës, frikësimit dhe pengimit që kanë synuar profesionistët e medias. Sipas të dhënave të përmendura nga Shoqata e Gazetarëve të Shqipërisë, shumica e incidenteve kanë përfshirë efektivë policie, të cilët kanë penguar gazetarët të kryejnë detyrën.
Organizata thekson se ndërhyrjet e tilla dëmtojnë lirinë e informimit dhe punën e pavarur të medias, veçanërisht gjatë raportimit nga demonstratat dhe ngjarjet publike.
Thirrje për protokolle sigurie
ECPMF i bën thirrje drejtorit të përgjithshëm të Policisë së Shtetit, Skënder Hita, që të angazhohet pa vonesë në dialog me Shoqatën e Gazetarëve të Shqipërisë dhe organizata të tjera mediatike për hartimin dhe zbatimin e protokolleve të menjëhershme sigurie për gazetarët në terren.
Në deklaratë theksohet nevoja për standarde të qarta që garantojnë aksesin e gazetarëve dhe mbrojtjen e tyre gjatë mbulimit të protestave dhe aktiviteteve publike.
