Dy vëllezër të vrarë dhe një i plagosur në Bathore; i dyshuari, punonjës i Policisë Ushtarake
Dy vëllezër humbën jetën dhe një tjetër u plagos pas një konflikti me armë mesditën e së dielës në Bathore, Kamëz. Policia arrestoi si autor të dyshuar Ngushëllim Manzin, punonjës i Policisë Ushtarake.
Dy vëllezër u vranë dhe një i tretë mbeti i plagosur mesditën e së dielës në zonën e Bathores, në Kamëz, pas një konflikti që degjeneroi në përdorim arme zjarri. Ngjarja ndodhi në rrugën “Petrela”.
Sipas Policisë, përplasja nisi për motive të dobëta mes Ngushëllim Manzit dhe tre vëllezërve Selam, Nazmi dhe Shefqet Islami, dhe u përshkallëzua deri në të shtëna.
Selam Islami, rreth 30 vjeç, humbi jetën në vendngjarje. Nazmi Islami, 48 vjeç, dhe Shefqet Islami, rreth 44 vjeç, u dërguan në spital; pavarësisht ndërhyrjes mjekësore, 48‑vjeçari nuk arriti të mbijetojë, ndërsa vëllai tjetër po trajtohet nën kujdesin e mjekëve.
Shërbimet e Komisariatit të Policisë nr. 5 mbërritën pas njoftimit për të shtëna, ndërsa autori i dyshuar, rreth 40 vjeç, u kap dhe u arrestua. Policia bëri të ditur se ai është punonjës i Policisë Ushtarake.
Gjatë veprimeve hetimore u sekuestrua një pistoletë, e dyshuar si arma e krimit. Grupi hetimor po vijon punën për dokumentimin ligjor dhe sqarimin e rrethanave të plotë të ngjarjes.
