Trump fajëson emigracionin për dhunën në Francë dhe u bën thirrje autoriteteve: “Mbyllni kufijtë”
Donald Trump reagoi në rrjetet sociale për trazirat në Francë, duke i atribuar situatën emigracionit dhe duke kërkuar mbylljen e kufijve. Protestat janë përshkallëzuar me zjarrvënie dhe plaçkitje në disa qytete.
Donald Trump, ish-presidenti i SHBA-ve, ka lidhur valën e trazirave në Francë me emigracionin, duke u bërë thirrje autoriteteve franceze të mbyllin kufijtë dhe të rivendosin rendin. Reagimi i tij erdhi të dielën, pas javësh protestash që kanë shpërthyer në disa qytete të mëdha.
“Franca po digjet!”
Në një postim në platformën Truth Social, Trump pretendoi se ardhja e njerëzve nga kultura “krejtësisht të ndryshme” ka përkeqësuar situatën në vend dhe kërkoi masa të menjëhershme për kontrollin e kufijve.
“Mbyllni kufijtë dhe merrni kontrollin, para se të jetë tepër vonë!”
Përshkallëzimi i protestave
Protestat, që nisën kundër rritjes së kostos së jetesës dhe përkeqësimit të shërbimeve publike, kulmuan të shtunën me episodet më të rënda të dhunës vitet e fundit. Në Limoges, një zjarr përfshiu godinën 143-vjeçare të bashkisë dhe maja e kullës së saj u shemb, sipas pamjeve të shpërndara nga mediat. Në Marsejë, persona të maskuar hynë me forcë në bashki dhe shkatërruan ambiente të brendshme, ndërsa në Lion u dogj zyra turistike e qytetit dhe pati përplasje në rrugë.
Përveç dëmeve të shumta në ndërtesa publike dhe prona private, autoritetet raportuan edhe plaçkitje dyqanesh, përfshirë butikë dhe supermarkete, si dhe sulme ndaj efektivëve të policisë dhe punonjësve të medias.
Si nisën protestat
Lëvizja filloi muajin e kaluar mes nxënësve të shkollave të mesme në periferi veriore të Parisit, ku u ngritën shqetësime për mungesën e mësuesve dhe kushtet në shkolla. Me kalimin e javëve, kërkesat u zgjeruan, duke përfshirë kundërshtimin ndaj pabarazisë, rritjes së kostos së jetesës dhe rënies së cilësisë së shërbimeve publike.
Ndërsa shumica e protestave u zhvilluan paqësisht, grupe të vogla u përfshinë në akte dhune dhe përplasje me policinë. Forcat e sigurisë po përpiqen të ndalojnë përhapjen e mëtejshme të dhunës dhe të stabilizojnë situatën.
