Rey Manaj bën thirrje për qetësi në protestat: Respektojeni të drejtën e qytetarëve, ndaloni dhunën
Sulmuesi i Kombëtares, Rey Manaj, ka reaguar me një mesazh mbi protestat, duke dënuar dhunën ndaj studentëve dhe protestuesve. Ai kërkon dialog, respekt të të drejtës për t’u shprehur dhe ruajtje të karakterit paqësor të tubimeve.
Sulmuesi i Kombëtares shqiptare, Rey Manaj, ka reaguar me një mesazh lidhur me protestat, duke dënuar dhunën ndaj studentëve dhe protestuesve dhe duke bërë thirrje që të respektohet e drejta për të protestuar.
Manaj thekson se studentët përfaqësojnë të ardhmen e vendit dhe duhet të trajtohen me dinjitet, ndërsa e konsideron të papranueshme çdo akt dhune, veçanërisht kur vjen nga ata që kanë detyrë të mbrojnë qytetarët.
Sipas tij, qytetarët kanë të drejtë të ngrejnë zërin për një të ardhme më të mirë, për paga të drejta, pensione dinjitoze dhe kushte jetese më të përballueshme.
“Zëri i qytetarëve duhet dëgjuar, jo të mbytet me dhunë”, thekson futbollisti në mesazhin e tij.
Ai u bën thirrje edhe protestuesve që të ruajnë paqen dhe të mos dëmtojnë pronën private, duke nënvizuar se protesta duhet të zhvillohet me dinjitet dhe pa u shndërruar në përplasje.
Manaj sqaron se nuk mban anë politike; mesazhi i tij vjen si thirrje për një vend ku të rinjtë të kenë perspektivë, qytetarët të respektohen dhe askush të mos ketë frikë të shprehë mendimin.
Në përfundim, ai kërkon mbrojtjen e studentëve, respektimin e qytetarëve dhe ndalimin e dhunës, duke theksuar se e ardhmja e Shqipërisë meriton më shumë.
