Rama: Po shmang kurthin e dhunës; kujton 21 janarin dhe apelon për vetëpërmbajtje
Kryeministri Edi Rama tha se po përpiqet të mos bjerë në “kurthin e dhunës” gjatë protestave në Tiranë, duke kujtuar 21 janarin dhe duke bërë thirrje për vetëpërmbajtje. Ai vlerësoi rolin e policisë dhe dënoi sulmet me gurë e mjete të forta.
Kryeministri Edi Rama deklaroi se po përpiqet të mos bjerë në “kurthin e dhunës” lidhur me protestat në Tiranë, duke theksuar se situata kërkon vetëpërmbajtje dhe kujdes. Ai foli për goditjet ndaj policisë dhe për rrezikun që paraqesin gurët dhe mjetet e forta të përdorura gjatë përplasjeve pranë bulevardit “Dëshmorët e Kombit”.
Rama tha se e mban “ende të freskët” 21 janarin, duke kujtuar vrasjen me armë zjarri të katër protestuesve dhe plagosjen e dhjetëra të tjerëve, si edhe frikën e asaj kohe te të lënduarit për të shkuar në spital. Ai e quajti vetëpërmbajtjen thelbësore në përballjen me tensionet.
Duke përmendur mijëra gurët e shkëputur nga trotuaret, kryeministri i cilësoi ato si “praktikisht armë” që mund të shkaktojnë pasoja të rënda. Ai referoi edhe rastin e një oficeri të policisë të goditur në Shkodër, duke e përshkruar si dëshmi të rrezikut që përballen efektivët.
Sipas Ramës, pjesëmarrësit në protesta përbëjnë një turmë që “në rastin më të mirë shkon në 1500 vetë”, ku një pjesë janë paqësorë, ndërsa të tjerë hedhin gurë, zare hekuri dhe vida drejt policisë. Ai tha se e kupton se shumë prej tyre janë të rinj, por theksoi se jeta e tyre “vlen më shumë se çdo gjë tjetër”.
Kryeministri vlerësoi punën e policisë, duke e përshkruar si “qëndresën e shtetit” dhe kërkoi mbështetje morale për efektivët që, sipas tij, po përballen me flakët, molotovët dhe mjetet e forta “pa kërkuar vëmendje apo promovim”.
“Jam përpjekur të mos përfshihem dhe të koordinoj me shumë durim një përpjekje për të mos rënë në kurthin e ngritur të dhunës që kërkon gjak... Vetëpërmbajtja është A dhe Zh e kësaj historie,” tha Rama.
