Punimet në unazën e Junikut vijojnë; projekti mbi 437 mijë euro financohet nga Qeveria
Ministri Dimal Basha njoftoi se puna në rrugën unazore të Junikut po vazhdon, me financim të plotë nga Qeveria e Kosovës dhe vlerë mbi 437 mijë euro. Projekti zbatohet në bazë të një Memorandumi Mirëkuptimi me Komunën e Junikut.
Ministri i Infrastrukturës dhe Transportit, Dimal Basha, ka bërë të ditur se po vazhdojnë punimet në ndërtimin e rrugës unazore në Junik, një projekt i financuar tërësisht nga Qeveria e Kosovës me vlerë mbi 437 mijë euro.
Sipas ministrit, zbatimi i projektit po bëhet në kuadër të një Memorandumi Mirëkuptimi ndërmjet Qeverisë dhe Komunës së Junikut.
Faza aktuale e punimeve përfshin gërmime dhe punime betoni, ndërtimin e kanaleve dhe vendosjen e gypave, si dhe asfaltimin e trasesë.
Parashihen gjithashtu ndërtimi i ujëmbledhësve, vendosja e sinjalizimit horizontal dhe vertikal, si edhe instalimet elektrike dhe ndriçimi, të cilat do të realizohen sipas standardeve evropiane.
Ministri theksoi se investimet në infrastrukturë dhe zhvillimi i komunave synojnë përmirësimin e kushteve të jetesës për qytetarët.
