Kosova arriti rezultat historik në Kampionatin Evropian të peshëngritjes për juniorë dhe U-23 në Durrës. Emily Ibanez Guerrero mori tri të arta dhe theu dy rekorde botërore, ndërsa vëllai i saj Brayan shtoi një të artë dhe dy të argjendta.
Dy peshëngritësit me prejardhje kubane, Emily Ibanez Guerrero dhe Brayan Guerrero Ibanez, debutuan për Kosovën me gjashtë medalje në Kampionatin Evropian për juniorë dhe U-23 që po zhvillohet në Durrës, Shqipëri.
Emily, 15 vjeçe, triumfoi në kategorinë deri në 69 kg (juniorë) me tri medalje të arta: në shkëputje, në shtytje dhe në total. Ajo ngriti 103 kg në shkëputje dhe 128 kg në shtytje, për një total prej 231 kg, duke vendosur dy rekorde botërore në disiplinat e saj.
Ky ishte starti i saj i parë zyrtar për Kosovën, i bërë i mundur përmes shtetësisë së nënës së saj. Sipas Federatës së Peshëngritjes së Kosovës, suksesi i Emilyt shënon një moment të veçantë për sportin kosovar.
Vëllai i saj, Brayan Guerrero Ibanez, garoi te juniorët në kategorinë deri në 85 kg dhe fitoi një medalje të artë në shkëputje, ndërsa në shtytje dhe në total u rendit i dyti, duke sjellë edhe dy medalje të argjendta për Kosovën.
Të dy janë fëmijët e trajnerit Ciro Luis Ibanez Goicoecheas, i cili drejton edhe peshëngritësin Kianoush Rostami. Brayan u pajis me shtetësi të Kosovës më 3 qershor, ndërsa më 26 qershor, “për arsye sportive”, shtetësia iu dha edhe nënës së tyre, e cila bashkë me babain është pjesë e stafit trajner.
