Filozofi rus Alexander Dugin ka komentuar në X protestat në Shqipëri, duke i përshkruar shqiptarët si një popull që “po zgjohen”. Kryeministri Edi Rama ka aluduar më herët për ndikime të huaja në protestat, pa përmendur ndonjë vend.
Alexander Dugin, ideolog ultranacionalist rus, ka reaguar së fundi në rrjetin X lidhur me protestat në Shqipëri, duke thënë se shqiptarët “po zgjohen” dhe “po tregojnë ngjyrat e tyre”.
Në shkrimin e tij, Dugin thekson: “Tani shqiptarët po tregojnë fytyrën e tyre të vërtetë. Ky komb u ndërtua nga të krishterët ortodoksë (prifti ortodoks Fan Noli), dhe islami i tyre është sufi dhe mistik... Tani po zgjohen.”
Ai i referohet shqiptarëve si “indoevropianë” dhe i përshkruan si “një popull shumë interesant dhe trim”. Komentet e tij vijnë mes demonstratave të fundit në vend.
Dugin është i njohur për teorinë euroaziatike dhe për qëndrimet kundër Perëndimit. Libri i tij “The Foundations of Geopolitics” (1997) argumenton zgjerimin e ndikimit rus përmes aleancave, aneksimeve dhe dobësimit të rendit perëndimor. Për këtë arsye shpesh është cilësuar si “truri i Putinit” ose “Rasputini i Putinit”.
Ndërkohë, kryeministri Edi Rama ka aluduar më herët për frymëzime të huaja në protestat në Shqipëri, por pa përmendur asnjë vend konkret.
