Dita e gjashtë e protestës para Ministrisë së Arsimit; i riu djeg certifikatën e Olimpiadës
Studentët dhe qytetarë të tjerë u grumbulluan sërish këtë të diel para Ministrisë së Arsimit. Një i ri dogji certifikatën e fituesit të Olimpiadës së Historisë, ndërsa bëri thirrje të mos përdoret dhunë ndaj Policisë.
Këtë të diel u shënua dita e gjashtë e protestës para Ministrisë së Arsimit, ku u mblodhën sërish studentë dhe qytetarë të tjerë.
Protestuesit u panë me flamuj kombëtarë në duar, të rinj me dhe pa maska, ndërsa thirrjet kërkonin dorëheqjen e kryeministrit.
Gjatë tubimit, një prej të rinjve u bëri thirrje pjesëmarrësve të shmangnin dhunën ndaj efektivëve të Policisë.
Si shenjë revolte, ai më pas dogji certifikatën që i ishte dhënë si fitues i Olimpiadës së Historisë nga ish-ministrja e Arsimit, Besa Shahini.
Protesta vazhdon paqësisht, me pjesëmarrje të shtuar nga dita në ditë, sipas pamjeve dhe raportimeve nga vendi i ngjarjes.
