Thomas Brdariq shpjegon largimin nga Malisheva: “Kishte obligime të papërmbushura”

Trajneri gjermano-kroat Thomas Brdariq ka folur për herë të parë pas largimit nga Malisheva, vetëm katër muaj pasi e nisi me rezultate të mira në Superligën e Kosovës. Ai është transferuar te Al-Bukiryah, ekip i ligës së dytë në Arabinë Saudite.

Në një intervistë për “Transfermarkt”, Brdariq tha se situata te Malisheva nuk ishte më e përshtatshme dhe se klubi nuk i kishte përmbushur detyrimet ndaj tij.

“Situata në tërësi nuk ishte më e përshtatshme. Vazhdimisht kishte obligime të papërmbushura. Në fund, më është dashur të marr një vendim për veten dhe, mbi të gjitha, për familjen time”.

“Ky ishte një vendim jashtëzakonisht i vështirë për mua. Jam trajner profesionist dhe nga ana sportive gjithçka po shkonte shumë mirë. Më erdhi veçanërisht keq për lojtarët, sepse kishim bashkëpunuar vërtet shumë mirë”, u shpreh ai.

Malisheva ndërkohë ka emëruar zëvendësuesin: skuadra po drejtohet nga ish-futbollisti Kastriot Rexha.