PS reagon pas zjarrit te Gjykata e Lartë: Berisha parapriu me sulmet ndaj gjyqtarëve
Partia Socialiste dënoi sulmin me molotov ndaj godinës së Gjykatës së Lartë, ku u dëmtuan disa zyra, dhe akuzoi kreun e PD-së Sali Berisha se ka paraprirë dhunën me sulme verbale ndaj gjyqtarëve. Socialistët theksuan se nuk do të ketë kthim pas për Shqipërinë.
Partia Socialiste reagoi të dielën pas sulmit me molotov ndaj godinës së Gjykatës së Lartë në Tiranë, ku sipas njoftimeve u dogjën disa zyra.
Në deklaratën e saj, PS akuzoi kreun e Partisë Demokratike, Sali Berisha, se me sulmet publike ndaj gjyqtarëve që përcaktuan masat e sigurisë për protestuesit ka paraprirë aktet e dhunës.
“Flakët mbi Gjykatën e Lartë i parapriu Sali Berisha, i cili sulmoi gjyqtarët që dhanë masa mbi dhunuesit e ligjit. Nuk ka kthim mbrapa për Shqipërinë”, thuhet në reagimin e socialistëve.
Ngjarja ka sjellë reagime të menjëhershme politike, ndërsa dëmet materiale në godinë janë raportuar në disa ambiente të brendshme.
Autoritetet nuk kanë bërë të ditura detaje të tjera mbi autorët e sulmit apo hetimet në vijim.
