Protesta të dhunshme në Francë: qindra të arrestuar, zjarre në ndërtesa dhe dhjetëra policë të plagosur
Të shtunën, demonstrata kundër standardeve në arsim dhe kostos së jetesës u shndërruan në përleshje në disa qytete të Francës. Qindra persona u arrestuan dhe ndërtesa publike e biznese u dëmtuan, përfshirë bashkinë e Limozhit.
Të shtunën në mbarë Francën shpërthyen përleshje gjatë demonstratave kundër standardeve në arsim dhe kostos së jetesës, me të paktën 400 persona të arrestuar dhe rreth 550,000 protestues që dolën në rrugë, sipas autoriteteve.
Në Paris, përplasjet me policinë zgjatën deri në mbrëmje. Forcat e rendit përdorën gaz lotsjellës dhe topa uji për të shpërndarë turmat, ndërsa në pjesë të ndryshme të kryeqytetit u vunë zjarre dhe u dogjën automjete, përfshirë zona simbolike si Place de la République. Raportohet për plaçkitje dyqanesh dhe dëme në të paktën një restorant.
Shkallëzim dhune u shënua edhe në qytete të tjera. Në Limozh (Limoges), një zjarr i madh në bashki çoi në shembjen e një pjese të ndërtesës; sipas prefekturës lokale, godina u “shkatërrua në masë të madhe”. Në Lion (Lyon), kryebashkiaku Grégory Doucet e përshkroi djegien e zyrës turistike si “një tragjedi” për qytetin.
Ministri i Brendshëm Laurent Nuñez bëri të ditur se gjashtëdhjetë oficerë të rendit u plagosën, ndërsa dy prej tyre u dërguan në spital pa ndjenja. Autoritetet folën për “akte të qëllimshme dhune” nga “individë të maskuar” në disa pjesë të vendit.
Në Saint-Étienne, kryetari i bashkisë Régis Juanico njoftoi se një i ri humbi dorën pas shpërthimit të një granate, duke e quajtur ngjarjen “një tragjedi që nuk duhet të kishte ndodhur kurrë”.
Në Paris, marshimi kryesor gjatë pasdites u zhvillua kryesisht paqësisht, sipas vëzhgimeve në terren, megjithëse me kalimin e orëve u shënuan zjarrvënie, përplasje dhe akte vandalizmi të përhapura në disa lagje.
