Përplasje të ashpra para Kryeministrisë: policia përdor plumba gome, protestuesit hedhin molotovë
Përpara Kryeministrisë u shënuan përplasje të forta mes policisë dhe protestuesve. Policia përdori plumba gome, ndërsa drejt efektivëve u hodhën molotovë; dy policë të Shqiponjave morën flakë për pak çaste, por zjarri u shua shpejt.
Para godinës së Kryeministrisë, protesta e sotme u përshkallëzua në përplasje të forta mes policisë dhe protestuesve, duke krijuar tension të lartë dhe skena kaotike.
Sipas pamjeve të shpërndara nga vendngjarja, efektivë të policisë kanë qëlluar me plumba gome në drejtim të protestuesve, teksa formacionet e rendit përpiqeshin të avanconin përpara.
Situata, në disa momente pothuajse jashtë kontrollit, e vuri policinë përballë vështirësive të mëdha për të shtyrë kordonët dhe për të stabilizuar perimetrin përreth godinës qeveritare.
Gjatë avancimit, drejt radhëve të policisë u hodhën koktej molotovi. Dy efektivë të njësisë Shqiponja morën flakë për një çast, por zjarri u shua shpejt.
Nuk ka të dhëna të tjera zyrtare mbi pasojat e menjëhershme, ndërsa tensionet në bulevard vazhduan për një periudhë të zgjatur.
