Ministri Gogu dënon dhunën te Gjykata e Lartë dhe Banka e Shqipërisë: Protesta po, dhunë jo

Ministri i Drejtësisë, Toni Gogu, reagoi të dielën mbrëma pas ngjarjeve në Tiranë, ku flakët prekën ndërtesën e Gjykatës së Lartë dhe u dëmtua hyrja e Bankës së Shqipërisë, gjatë një proteste të dhunshme që po vijon prej pesë ditësh.

Në një deklarim në rrjete sociale, Gogu dënoi aktet e dhunës dhe bëri dallim mes së drejtës për të protestuar dhe dëmtimit të institucioneve. Ai theksoi se këto dy institucione janë të pavarura dhe u shërbejnë të gjithë qytetarëve, pavarësisht bindjeve të tyre.

“Protesta është një e drejtë. Dhuna nuk është protestë... kush i vë zjarrin një gjykate, nuk godet qeverinë. Godet diçka që na përket të gjithëve. Të drejtën për drejtësi”, shkroi ai.

Ministri shprehu mbështetje për gjyqtarët dhe stafin e Gjykatës së Lartë dhe u shpreh se Ministria e Drejtësisë është e gatshme të ofrojë asistencë brenda kompetencave ligjore, duke respektuar pavarësinë e gjyqësorit.

“Njerëzit nuk duhet të paguajnë çmimin e dhunës. Dera e drejtësisë duhet të mbetet e hapur për të gjithë”, përfundoi Gogu.