Kongresmeni amerikan Robert Aderholt reagon për protestën studentore në ditën e pestë
Robert Aderholt shprehu shqetësim në X për përshkallëzimin e trazirave në Shqipëri dhe kërkoi refuzim të dhunës e respektim të të drejtave të protestuesve paqësorë.
Kongresmeni amerikan Robert Aderholt ka reaguar të enjten në platformën X lidhur me protestën studentore në Shqipëri, e cila ka hyrë në ditën e pestë. Ai shprehu shqetësim për përshkallëzimin e situatës në një vend aleat të NATO-s.
Në mesazhin e tij, Aderholt theksoi se qytetarët shqiptarë duhet të gëzojnë sundimin e ligjit, institucione të përgjegjshme dhe lirinë për të shprehur mendimin e tyre.
“Të gjitha palët duhet të refuzojnë dhunën, ndërsa qeveria duhet të respektojë të drejtat e protestuesve paqësorë. Të rinjtë shqiptarë meritojnë të kenë zërin e tyre në përcaktimin e së ardhmes së vendit të tyre,” shkroi ai.
Ky është një tjetër reagim nga anëtarë të Kongresit amerikan në lidhje me zhvillimet e fundit në Shqipëri, me fokus te garantimi i të drejtave themelore gjatë tubimeve.
Protesta studentore po vijon në Tiranë për të pestën ditë radhazi, ndërsa thirrja e kongresmenit thekson nevojën për qetësi dhe respektim të rregullave demokratike.
