Idajet Beqiri: Protestat kërkojnë të përsërisin skenarin e 1997-s dhe të pengojnë rrugën drejt BE-së
Avokati Idajet Beqiri deklaroi se protestat e ditëve të fundit në Tiranë synojnë destabilizimin e vendit dhe pengimin e integrimit evropian. Ai i quajti veprimet e dhunshme përpjekje për të krijuar një “vit 1997” të ri.
Avokati Idajet Beqiri, në një intervistë televizive, komentoi protestat e zhvilluara së fundmi në Tiranë, duke thënë se po tentohet çuarja e Shqipërisë drejt një skenari të ngjashëm me vitin 1997 dhe pengimi i integrimit në Bashkimin Evropian.
Sipas tij, protestat dhe aktet e vandalizmit kanë për qëllim destabilizimin e vendit në një moment kyç për procesin evropian. Beqiri argumentoi se “nuk është protestë qytetare, nuk është protestë e shqiptarëve”, por një nismë që synon ta kthejë Shqipërinë “përsëri në zero”.
Beqiri e lidhi këtë situatë me zhvillimet e së kaluarës, duke akuzuar Sali Berishën për “përmbysje të sistemit” dhe për pasoja afatgjata, përfshirë shkatërrimin e industrive dhe largimin masiv të specialistëve. Ai përmendi deklarime mbi largimin e shqiptarëve ndër vite, duke e cilësuar këtë si pasojë e përmbysjeve të mëparshme.
Duke iu referuar fazës aktuale të negociatave me BE-në, avokati theksoi se vendi është pranë një momenti historik dhe se standardet e kërkuara nuk mund të arrihen nëse shoqërohen me destabilitet. “Asnjë vend nuk të pranon në Bashkimin Evropian nëse nuk plotëson standardet e nevojshme”, tha ai.
Beqiri kritikoi edhe momentin e protestave, duke theksuar se zhvillimi i tyre në qershor, kur nis kulmi i sezonit turistik, dërgon sinjale negative. Ai përmendi lëvizjen e protestuesve nga Bulevardi “Dëshmorët e Kombit” drejt Rinasit dhe pengesat për turistët, si shembull të mesazhit dekurajues për vizitorët.
