Shkodër: 39-vjeçari kapet duke kërcënuar me thikë bashkëjetuesen, arrestohet në flagrancë
Një 39-vjeçar u arrestua në Shkodër, pasi dyshohet se dhunoi dhe tentoi të godiste me thikë bashkëjetuesen. Ngjarja ndodhi në lagjen “Partizani”, ndërsa policia sekuestroi mjetin prerës dhe e ndaloi autorin.
Një 39-vjeçar është arrestuar në flagrancë në Shkodër, pasi dyshohet se ka ushtruar dhunë ndaj bashkëjetueses dhe ka tentuar ta godasë me thikë në banesë. Ngjarja u regjistrua në lagjen “Partizani”.
Sipas të dhënave zyrtare, shërbimet e Policisë ndërhynë menjëherë pas marrjes së njoftimit për dhunë në familje dhe kapën 39-vjeçarin me inicialet A. D. në momentin kur po tentonte të godiste me thikë bashkëjetuesen e tij.
Gjatë ndërhyrjes, efektivët sekuestruan thikën që dyshohet të jetë përdorur në tentativë, e cila do të shërbejë si provë materiale në hetim. E dëmtuara është jashtë rrezikut për jetën.
Pas veprimeve procedurale, i dyshuari, banues në Shkodër, u arrestua në flagrancë. Materialet hetimore iu referuan Prokurorisë për veprat penale “Dhuna në familje” dhe “Prodhimi, mbajtja, blerja apo shitja pa leje e armëve të ftohta”.
