Korçë: 2 të arrestuar, 23 të proceduar pas dhunës në tubimin e 15 tetorit
Në Korçë u arrestuan në flagrancë dy të rinj dhe u proceduan penalisht 23 të tjerë, mes tyre 15 të mitur, pas akteve të dhunës gjatë një tubimi më 15 tetor. Policia njofton për dëmtime në disa institucione dhe hapësira publike.
Dy persona u arrestuan dhe 23 të tjerë u proceduan penalisht, 15 prej tyre të mitur, pas incidenteve të dhunshme të regjistruara gjatë tubimit të 15 tetorit në Korçë.
Sipas Policisë, gjatë grumbullimit dhjetëra pjesëmarrës, disa të maskuar, hodhën gurë, pllaka guri dhe sende të forta metalike drejt institucioneve shtetërore dhe pronave publike, si dhe kundërshtuan punonjësit e Policisë.
Si pasojë, u dëmtuan godinat e Bashkisë Korçë, Drejtorisë Arsimore, Universitetit “Fan S. Noli” dhe gjimnazit “Raqi Qirinxhi”. Dëme u shënuan gjithashtu në kangjellat e trotuareve, tabelat e reklamave dhe sinjalistikën rrugore.
Në vijim të hetimeve nën drejtimin e Prokurorisë së Korçës, u arrestuan në flagrancë shtetasit F. L., 21 vjeç, banues në Voskop, dhe O. K., 19 vjeç, banues në Bilisht. Ndaj 23 shtetasve të tjerë ka nisur procedimi penal.
Grupi hetimor, në bashkëpunim me Prokurorinë, vijon punën për dokumentimin e plotë të ngjarjes dhe identifikimin e personave të tjerë që dyshohet se u përfshinë në dhunë ndaj punonjësve të Policisë, institucioneve shtetërore dhe subjekteve private. Materialet procedurale i janë referuar Prokurorisë së Korçës për veprime të mëtejshme.
