Rama takim me Luc Frieden në Luksemburg: nga marsi nis linja direkte e Luxair me Shqipërinë
Kryeministri Edi Rama u takua në Luksemburg me homologun Luc Frieden, ku u diskutuan marrëdhëniet dypalëshe dhe rruga europiane e Shqipërisë. Rama njoftoi se nga muaji mars do të nisë një fluturim direkt Luksemburg–Shqipëri nga kompania Luxair.
Kryeministri Edi Rama zhvilloi një takim në Luksemburg me kryeministrin Luc Frieden, ku sipas njoftimit të tij në rrjete sociale, në qendër ishin marrëdhëniet dypalëshe dhe rrugëtimi europian i Shqipërisë.
Pas bisedimeve, Rama bëri të ditur se nga muaji mars Luksemburgu do të ketë një fluturim direkt me Shqipërinë, i cili do të operohet nga kompania ajrore kombëtare Luxair.
“Luksemburg – Me Kryeministrin Luc Frieden, për marrëdhëniet dypalëshe dhe rrugëtimin europian të Shqipërisë,” shkroi Rama, duke njoftuar edhe për lidhjen e re ajrore mes dy vendeve.
Sipas njoftimit, kjo linjë pritet të lehtësojë lëvizjen e qytetarëve dhe të forcojë kontaktet mes Shqipërisë dhe Luksemburgut.
Takimi vjen në kuadër të përpjekjeve për të thelluar bashkëpunimin dhe për të mbështetur procesin integrues të Shqipërisë në Bashkimin Europian.
