Kurti shmang komentin për deklaratën e Daçiqit për flamurin serb në Prizren; flet Konjufca
Kryeministri Albin Kurti nuk komentoi deklaratën e Ivica Daçiqit se flamuri serb do të valëvitet mbi Prizren, duke iu referuar qëndrimit të ministrit Glauk Konjufca. Shefi i diplomacisë e quajti retorikën e Beogradit dëshmi të ambicieve territoriale ndaj Kosovës.
Kryeministri i Kosovës, Albin Kurti, nuk dha koment kur u pyet për deklaratën e zëvendëskryeministrit serb Ivica Daçiq, i cili tha se flamuri serb “herët a vonë do të valëvitet mbi Prizren”. Kurti u përgjigj se për këtë çështje ka folur ministri i Punëve të Jashtme dhe Diasporës, Glauk Konjufca, duke shtuar: “Ka dhënë deklarimet ministri i Punëve të Jashtme dhe Diasporës, më duhet të shkoj për 20 minuta”.
Daçiq, njëherësh kryetar i Partisë Socialiste të Serbisë, më 7 tetor, gjatë një tubimi zgjedhor në Rashkë, deklaroi se flamuri serb do të valëvitet “herët a vonë” mbi Prizren. Ai po ashtu theksoi se partia e tij nuk do ta njohë kurrë pavarësinë e Kosovës dhe pretendoi se, nëse fiton besimin e qytetarëve në zgjedhjet e ardhshme, edhe 20 shtete të tjera do ta tërheqin njohjen e Kosovës.
Ndaj këtyre komenteve reagoi ministri i Punëve të Jashtme dhe Diasporës, Glauk Konjufca, i cili më 10 tetor në platformën X i cilësoi ato si dëshmi të ambicieve territoriale të Serbisë ndaj Kosovës. Sipas tij, retorika e Daçiqit tregon se këto ambicie nuk i përkasin vetëm së kaluarës.
Konjufca e lidhi deklaratën e Daçiqit edhe me paraqitjen publike të Millan Radojçiqit në një tubim të Partisë Progresive Serbe në Kragujevc, ku ishte i pranishëm edhe Danilo Vuçiq, djali i presidentit serb, Aleksandar Vuçiq.
Sipas Konjufcës, këto nuk janë provokime të izoluara, por shenjë e vazhdimësisë së një politike që shfaq ekspansionizëm territorial në retorikë dhe pandëshkueshmëri për agresionin e armatosur në praktikë. Ai u bëri thirrje partnerëve ndërkombëtarë t’i dënojnë këto veprime dhe të kërkojnë përgjegjësi, duke theksuar se sovraniteti i Kosovës “nuk është i negociueshëm”.
Kurti, ndërkohë, la të kuptohet se qëndrimi zyrtar i Qeverisë për çështjen është ai i shpërndarë nga shefi i diplomacisë, duke mos dhënë komente shtesë.
