Kremlini rrëzon idenë e armëpushimit 60‑ditor të Zelenskyt, kërkon marrëveshje “afatgjatë”
Moska ka refuzuar propozimin e Volodymyr Zelenskyt për një armëpushim dy‑mujor që do të lejonte zhvillimin e zgjedhjeve presidenciale në Ukrainë, duke theksuar se synon një paqe të qëndrueshme, jo një ndalesë të përkohshme të luftimeve.
Kremlini ka refuzuar propozimin e presidentit ukrainas, Volodymyr Zelensky, për një armëpushim 60-ditor, i parashikuar t’i hapte rrugë mbajtjes së zgjedhjeve presidenciale në Ukrainë.
Sipas autoriteteve ruse, një ndërprerje e kufizuar në kohë e luftimeve nuk është qëllimi i tyre. Moska thotë se kërkon një marrëveshje të plotë dhe afatgjatë për t’i dhënë fund konfliktit.
Zelensky i bëri thirrje presidentit rus, Vladimir Putin, të pranojë një armëpushim të plotë për 60 ditë, me qëllim organizimin e procesit zgjedhor. Thirrja u bë gjatë një interviste për programin amerikan “This Week”.
Zëdhënësi i Kremlinit, Dmitry Peskov, deklaroi të hënën se Rusia nuk është e interesuar për një pauzë të përkohshme, por për një zgjidhje të qëndrueshme.
“Ne nuk duam armëpushim. Ne duam paqe afatgjatë dhe jemi të gatshëm të bëjmë gjithçka që është e mundur për ta arritur atë”, tha Peskov, duke iu referuar qëndrimit të përsëritur nga presidenti Vladimir Putin dhe zyrtarë të tjerë rusë.
