Pas goditjes në aeroportin e Riadit, Trump sinjalizon mundësi për angazhim amerikan kundër Huthive
Presidenti amerikan Donald Trump tha se SHBA po shqyrton përfshirjen në luftën kundër Huthive pas një sulmi vdekjeprurës në Aeroportin Ndërkombëtar King Khalid në Riad, ku u vranë 12 persona dhe u plagosën 309 të tjerë.
Presidenti amerikan Donald Trump deklaroi të dielën në bazën ajrore Andrews se po shqyrton mundësinë që SHBA t’i bashkohet luftës kundër grupit Huthi në Jemen, pas një sulmi vdekjeprurës të së shtunës në Aeroportin Ndërkombëtar King Khalid në Riad, ku u vranë 12 persona dhe u plagosën 309 të tjerë.
Autoritetet saudite të aviacionit njoftuan se disa nga të plagosurit janë në gjendje kritike. Rebelët Huthi kanë marrë përgjegjësinë për goditjen, e cila ishte e treta ndaj të njëjtit aeroport brenda një jave.
Trump e përshkroi sulmin si “të tmerrshëm” dhe tha se një vendim për hapat e ardhshëm të Uashingtonit pritet së shpejti.
“Do të marrim një vendim së shpejti,” tha ai, duke shtuar se do të zhvillojë një bisedë me princin e kurorës saudite, Mohammed bin Salman.
Ndërkohë, sekretari amerikan i Shtetit, Marco Rubio, konfirmoi se një shtetas amerikan është mes viktimave. Ai i cilësoi goditjet “të papranueshme” dhe bëri thirrje që ato të ndalen.
Shqyrtimi i mundshëm i përfshirjes amerikane vjen mes rritjes së tensioneve rajonale dhe përsëritjes së sulmeve ndaj infrastrukturës ajrore saudite.
