Kamberi: Vuçiqi po përpiqet të ndalë ndërkombëtarizimin e çështjes së Luginës së Preshevës
Deputeti Shaip Kamberi reagoi ndaj deklaratave të Aleksandar Vuçiqit për listën e përbashkët shqiptare, duke thënë se etiketimi i saj si “armike e shtetit” synon zhvendosjen e vëmendjes nga të drejtat e shqiptarëve në Luginë. Ai theksoi se ndikimi politik i përfaqësimit të bashkuar matet edhe jashtë numrave në Parlament.
Deputeti i vetëm shqiptar në Parlamentin e Serbisë, Shaip Kamberi, ka reaguar të premten ndaj deklaratave të presidentit Aleksandar Vuçiq kundër listës së përbashkët parlamentare shqiptare, duke theksuar se kjo qasje synon të pengojë ndërkombëtarizimin e çështjeve të shqiptarëve në Luginën e Preshevës.
Sipas Kamberit, përpjekja për ta paraqitur listën si armike të shtetit zhvendos debatin nga problemet konkrete të shqiptarëve dhe nga përfaqësimi i tyre i pavarur. “Çështja nuk është domosdoshmërisht sa deputetë shqiptarë do të hyjnë në Parlament, por çfarë do të përfaqësojnë ata politikisht dhe çfarë mund të bëjnë me atë përfaqësim”, shkroi ai.
Ai tha se etiketimi i listës si armiqësore, ndonëse e certifikuar nga organet zgjedhore, e shndërron garën politike në test besnikërie ndaj pushtetit. Sipas tij, ky narrativ synon të përçajë listën shqiptare, të ushtrojë presion ndaj partive dhe kandidatëve që mund të bashkëpunojnë me të dhe të krijojë klimë ku kritikat ndaj qeverisë interpretohen si veprime kundër interesit të Serbisë.
Kamberi theksoi se pesha e përfaqësimit shqiptar nuk matet vetëm me vota, por edhe me aftësinë për ta ngritur çështjen në institucione vendore dhe ndërkombëtare. Ai përmendi tri fusha ndikimi: debatin në Kuvend për pasivizimin e adresave, diskriminimin dhe nënpërfaqësimin; adresimin e këtyre temave në institucionet evropiane dhe organizatat ndërkombëtare; si dhe dëshmimin e një përfaqësimi që nuk identifikohet me politikën e qeverisë serbe.
Në reagimin e tij, Kamberi akuzoi Vuçiqin se po zhvendos fokusin nga të drejtat te siguria kombëtare, duke e vendosur pakicën në pozitë mbrojtëse dhe duke shmangur detyrimet e shtetit për zbatimin e katër marrëveshjeve të nënshkruara ndër vite. “Ndikimi i deputetit nuk matet vetëm me votat që ka në Parlament, por edhe me aftësinë për ta bërë një problem të brendshëm çështje të përgjegjësisë institucionale dhe ndërkombëtare”, theksoi ai.
Ai përfundoi se kundërshtimi ndaj ndërkombëtarizimit të çështjes së Luginës synon të kufizojë ndikimin politik e diplomatik të përfaqësimit shqiptar dhe se një listë e bashkuar, kritike dhe e pavarur mund të jetë e vështirë për t’u neutralizuar, pavarësisht numrave.
