Ferit Hoxha i përgjigjet Daçiçit: Kosova është realitet i pakthyeshëm, retorika kërcënon stabilitetin
Ministri i Jashtëm i Shqipërisë, Ferit Hoxha, reagoi ndaj deklaratës së Ivica Daçiç për Prizrenin, duke e cilësuar retorikë kërcënuese dhe duke theksuar se Kosova është shtet sovran e demokratik. Ai paralajmëroi se gjuha nxitëse rrezikon të shndërrohet në veprime.
Ministri i Jashtëm i Shqipërisë, Ferit Hoxha, ka reaguar ndaj deklaratës së ministrit serb Ivica Daçiç, i cili gjatë fushatës premtoi se “do ta ngrinte sërish flamurin e tyre” në Kosovë. Hoxha e cilësoi këtë retorikë si kërcënuese dhe të motivuar politikisht, duke theksuar se Republika e Kosovës është një realitet i pakthyeshëm.
Sipas Hoxhës, një gjuhë e tillë nuk është thjesht retorikë elektorale, pasi mund të inkurajojë veprime në terren. Ai rikujtoi ngjarjen e Banjskës si paralajmërim se fjalët mund të shndërrohen në akte, duke vënë në dukje se përgjegjësia e plotë ende nuk është përcaktuar.
Shefi i diplomacisë shqiptare theksoi se rruga e vetme përpara kalon përmes fqinjësisë së mirë, bashkëpunimit rajonal dhe përpjekjeve për pajtim. Sipas tij, nuk mund të ketë bashkëpunim të qëndrueshëm kur mohohen realitetet, vihet në pikëpyetje legjitimiteti i fqinjëve ose përdoret gjuhë kërcënuese për përfitime politike.
Hoxha nënvizoi se ndërtimi i paqes dhe besimit kërkon kohë, vizion dhe përkushtim, duke kujtuar se vetë Evropa u ngrit mbi dialogun, respektin dhe solidaritetin, jo mbi frikësimin dhe nostalgjinë për të kaluarën.
“Republika e Kosovës është një realitet i pakthyeshëm,” theksoi ai, duke e përshkruar atë si shtet sovran e demokratik, pjesë të barabartë të rajonit, që po forcon pozicionin e vet në komunitetin evropian e ndërkombëtar. Sipas Hoxhës, e ardhmja e Kosovës duhet të jetë paqe, siguri, gjithëpërfshirje dhe integrim evropian.
