Shqipëria merr OK nga BE për mbylljen e Kapitullit 20 të negociatave
Kryeministri Edi Rama njoftoi se Bashkimi Evropian ka pranuar mbylljen e Kapitullit 20, që mbulon ndërmarrjet dhe politikën industriale. Ai e cilësoi hapin si nxitës për investime, inovacion, konkurrueshmëri dhe punësim.
Shqipëria ka marrë miratimin e Bashkimit Evropian për të mbyllur negociatat e Kapitullit 20, i cili lidhet me ndërmarrjet dhe politikën industriale. Njoftimin e bëri publik kryeministri Edi Rama përmes një postimi në Facebook.
Sipas Ramës, ky është kapitulli i parë që mbyllet në kuadër të procesit të anëtarësimit dhe përbën një hap domethënës në rrugën e integrimit evropian të vendit.
Kreu i qeverisë theksoi se vendimi i BE-së pritet të ndikojë pozitivisht në klimën ekonomike.
“Drita jeshile nga BE për mbylljen e negociatave të Kapitullit 20 forcon perspektivën për investime, inovacion, konkurrueshmëri dhe punësim,” shkroi Rama.
Kapitulli 20 trajton kuadrin për zhvillimin e ndërmarrjeve dhe politikën industriale, fusha që lidhen ngushtë me nxitjen e investimeve dhe rritjen e konkurrueshmërisë.
