Arrestohet në Asti 37-vjeçari nga Elbasani, i kërkuar për vrasje të mbetur në tentativë
Një 37-vjeçar i lindur në Elbasan u kap në Asti të Italisë, si pjesë e operacionit “The Wanted”. Autoritetet po finalizojnë ekstradimin drejt Shqipërisë.
Një 37-vjeçar shqiptar, i lindur në Elbasan dhe i shpallur në kërkim ndërkombëtar, u arrestua në Asti të Italisë, në kuadër të operacionit “The Wanted”. Policia e Shtetit bëri të ditur se kapja u mundësua në bashkëpunim me autoritetet italiane.
Sipas njoftimit, arrestimi erdhi si rezultat i punës së përbashkët mes specialistëve të Sektorit për Hetimin e Grupeve Kriminale, pranë Drejtorisë për Hetimin e Krimit të Organizuar, dhe shërbimeve të Gardës së Financës në Pisa.
Hetimet e deritanishme e lidhin 37-vjeçarin me një grup të strukturuar kriminal dhe dyshohet se në vitin 2022 ka ndërmjetësuar për vrasjen e shtetasit L. M., ngjarje që mbeti në tentativë.
Më 29 shtator 2026, GJKKO i caktoi masën e sigurisë “arrest në burg” për këtë person. Ai dyshohet për disa vepra penale, mes tyre “Vrasja”, e mbetur në tentativë, e kryer në kuadër të grupit të strukturuar kriminal, “Mbajtja pa leje dhe prodhimi i armëve, armëve shpërthyese dhe municionit”, si dhe “Grupi i strukturuar kriminal” dhe “Kryerja e veprave penale nga organizata kriminale apo grupi i strukturuar kriminal”.
Autoritetet njoftuan se bashkëpunimi mes Interpol Tiranës dhe Interpol Romës vijon për përfundimin e procedurave të ekstradimit të 37-vjeçarit drejt Shqipërisë.
