Rama: 400 biznese në proces aplikimi, 32 kredi të miratuara në skemën “Dyfisho Sipërmarrjen Tënde”
Kryeministri Edi Rama njoftoi se rreth 400 biznese po ndjekin procedurat për skemën e kredive me kushte të lehtësuara, ndërsa deri më 5 të muajit janë miratuar 32 kredi me vlerë rreth 5 milionë euro.
Kryeministri Edi Rama deklaroi gjatë një aktiviteti për programin “Dyfisho Sipërmarrjen Tënde” se rreth 400 biznese janë përfshirë në procesin e aplikimit dhe vlerësimit, ndërsa deri më 5 të muajit janë miratuar 32 kredi me vlerë totale rreth 5 milionë euro.
Sipas kreut të qeverisë, skema synon të mbështesë bizneset e vogla dhe të mesme përmes financimit me kushte të lehtësuara, me qëllim zgjerimin e aktivitetit dhe rritjen e investimeve.
“Programi ka ardhur si një nevojë për të mbështetur sipërmarrje të vogla dhe të mesme që ia kanë dalë t’u mbijetojnë sfidave,”tha Rama, duke theksuar rëndësinë e informimit të sipërmarrësve për mundësitë që ofron kjo nismë.
Skema parashikon interesa deri në 2%, garanci shtetërore deri në 70% dhe financim deri në 2 milionë euro, me afat shlyerjeje deri në 10 vjet, sipas kryeministrit.
Rama shtoi se interesi është në rritje dhe se ritmi i përpunimit të aplikimeve po përshpejtohet, duke ftuar bizneset që kanë ide dhe plane rritjeje të informohen dhe të aplikojnë.
