Comodita dërgon në SHBA mbishtresa dyshekësh të prodhuara në Kosovë
Kompania kosovare ka nisur sërish eksportin e mbishtresave të dyshekëve drejt tregut amerikan, duke theksuar kontrollet strikte të cilësisë dhe teknologjitë e avancuara të materialeve.
Prodhuesi kosovar i produkteve të gjumit, Comodita, po vijon eksportet në Shtetet e Bashkuara me mbishtresa dyshekësh të prodhuara në Kosovë dhe të përshtatura posaçërisht për kërkesat e tregut amerikan. Para paketimit dhe dërgimit, produktet kalojnë disa faza prodhimi dhe kontrollesh të cilësisë.
Menaxherja e laboratorit dhe kontrollit të cilësisë, Rona Gruda, tha se një tipar kryesor i këtyre mbishtresave është përdorimi i MemoryGel Infuse, që kombinon karakteristikat e shkumës Memory me teknologjinë Gel Infuse.
“Bëhet fjalë për mbishtresat e dyshekëve që udhëtojnë drejt tregut amerikan. Veçori e këtyre mbishtresave është MemoryGel Infuse, ku bëhet kombinimi i veçorive të shkumës Memory dhe teknologjisë Gel Infuse”, tha Rona Gruda.
Sipas kompanisë, një tjetër veçori është teknologjia Cooling, e cila synon të krijojë një sipërfaqe më të freskët dhe të ndihmojë në menaxhimin e nxehtësisë së trupit gjatë përdorimit.
“Secili produkt kalon në faza strikte testimi dhe përmbush standarde të larta të cilësisë, me materiale të certifikuara nga kompanitë e mëdha”, pohoi menaxherja Gruda.
Gruda e përshkroi dërgesën si vazhdim të një rruge të nisur më herët dhe rikthim të besimit në tregjet jashtë vendit.
“Kjo nuk është veç një dërgesë eksporti, është rikthim i besimit dhe vazhdim i historisë së nisur më herët. Çdo produkt është i punuar me finesë nga duart e punëtorëve tanë, nga Kosova për në shtëpitë amerikane”, shtoi ajo.
Comodita e sheh këtë dërgesë si një hap tjetër në zgjerimin e saj ndërkombëtar, duke çuar prodhimin kosovar në tregje gjithnjë e më të mëdha.
