Alket Rizai nuk u kthye në burg; hetuesit grekë dyshojnë se ka ikur drejt Shqipërisë ose Kosovës
Alket Rizai, i dënuar me burgim të përjetshëm, nuk u rikthye në Domokos pas lejes më 14 shtator. Hetuesit po shqyrtojnë skenarin e largimit jashtë Greqisë dhe lidhjen me një incident me të shtëna në Anavyssos.
Alket Rizai, i dënuar me burgim të përjetshëm, nuk u kthye në burgun e Domokos më 14 shtator pas përfundimit të lejes, dhe autoritetet greke dyshojnë se ai mund të jetë larguar nga vendi drejt Shqipërisë ose Kosovës.
Sipas hetuesve, një nga pistat kryesore është arratisja jashtë territorit grek. Paralelisht, po verifikohet itinerari i tij pas një incidenti të ndodhur një ditë më herët në Anavyssos, ku u raportuan të shtëna armësh pranë një beach bar-i.
Autoritetet thonë se konflikti nisi pasi pronari i lokalit i kërkoi të ulte muzikën, duke çuar në një debat të ashpër. Rizai dyshohet se ka nxjerrë një armë zjarri dhe mund të ketë qëlluar në ajër, ndërsa ngjarja mobilizoi klientë dhe punonjës që dolën jashtë për të parë situatën.
Për incidentin është arrestuar një 27-vjeçar me origjinë afgane, roje sigurie në lokal, i cili akuzohet për tentativë vrasjeje me armë zjarri. Si pasojë, dy kalimtarë u plagosën lehtë.
Hetuesit po shqyrtojnë gjithashtu një dëshmi sipas së cilës një automjet që dyshohet se lëvizte në të njëjtin aks me Rizain aktivizoi një fener të ngjashëm me atë të policisë dhe përdori megafon. Po verifikohet nëse kjo është përdorur për të krijuar përshtypjen e një mjeti policor dhe për të ndihmuar largimin.
Kontrollet po përqendrohen në përcaktimin e saktë të rrugës që ai ka ndjekur pas Anavyssos dhe nëse ka kaluar kufirin grek.
